Աճուրդի է հանվել անձեռոցիկը, որը պարունակում է Լիոնել Մեսսիի առաջին պայմանագիրը «Բարսայի» հետ։
Խոսքը «Բարսելոնայի» հետ Մեսսիի առաջին համաձայնագրի մասին է, որը ստորագրվել է 2000 թվականի դեկտեմբերի 14-ին։
Արգենտինացին, ով այդ ժամանակ 13 տարեկան էր, տպավորեց «Բարսելոնային» 2000 թվականի սեպտեմբերին երկշաբաթյա փորձաշրջանի ընթացքում, բայց ակումբը սկզբում տատանվում էր պայմանագիր կնքել ոչ եվրոպացի երիտասարդի հետ:
Այնուամենայնիվ, 2000 թվականի դեկտեմբերին խաղացողի գործակալ Օրասիո Գաջիոլին ասաց «Բարսելոնայի» այն ժամանակվա տնօրեն Կառլես Ռեքսակին , որ եթե նրանք չկարողանան պայմանագիր կնքել Մեսսիի հետ, ապա դեռահասին կառաջարկեն այլ ակումբներ, այդ թվում՝ «Ռեալին»:
Ռեքսակը, չցանկանալով բաց թողնել խաղացողին, Գաջիոլիին հրավիրել է ընթրիքի Բարսելոնա՝ վերջնական որոշում կայացնելու համար։ Պայմանավորվածություն ձեռք բերվեց, սակայն տնօրենը չհասցրեց լիարժեք պայմանագիր կազմել ու տպել։ Ապա առաջարկեց վերցնել անձեռոցիկը և դրա վրա գրել պայմանագրերը, որոնք այնուհետ կստորագրեն համապատասխան կողմերը՝ կնշանակեն իրավական պարտավորությունները։
Անձեռոցիկը աճուրդի է հանվել Լոնդոնի Bonhams-ում՝ աշխարհի ամենահին և ամենամեծ աճուրդի տներից մեկում։ Աճուրդը կտեւի մինչեւ մայիսի 17-ը։ Մեկնարկային գինը 220 հազար ֆունտ ստերլինգ է։
«Սա ամենահետաքրքիր թեմաներից մեկն է, որով երբևէ զբաղվել եմ: Այո, դա անձեռոցիկ է, բայց դա նույն հայտնի անձեռոցիկն է, որը սկիզբ դրեց Լիոնել Մեսսիի կարիերային :
Այն փոխեց Մեսսիի կյանքը, «Բարսելոնայի» ապագան և մեծ դեր ունեցավ ֆուտբոլի մի քանի մեծագույն պահերը ողջ աշխարհի միլիարդավոր երկրպագուներին փոխանցելու գործում», – ասել է աճուրդի տան գրքերի և ձեռագրերի ղեկավար Յան Էլինգը:
