Վրաստանի վարչապետ Իրակլի Կոբախիձեն հայտարարել է 2028 թվականին Չեմպիոնների Լիգայի եզրափակիչը Թբիլիսիում անցկացնելու մտադրության մասին։
Վրաստանի իշխանությունները 70 հազար հանդիսատեսի համար Թբիլիսիում ֆուտբոլային մարզադաշտ կկառուցեն, որը կարող է Չեմպիոնների Լիգայի եզրափակչի մակարդակով հանդիպումներ անցկացնել։
«Մենք ցանկանում ենք հայտարարել մի կարևոր մեգանախագծի մասին, որը վերաբերում է սպորտին, իսկ ավելի կոնկրետ՝ ֆուտբոլին և ռեգբիին։ Մենք ցանկանում ենք Թբիլիսիում կառուցել նոր մարզադաշտ, որը կսպասարկի այս երկու մարզաձևերը։
Այն կունենա 70000 հանդիսականի տարողություն և կլինի միջազգային ամենաբարձր չափանիշների մարզադաշտ, որը մեզ հնարավորություն կտա ընդունելու մեր մայրաքաղաքի ամենաբարձր կարգի հանդիպումները, այդ թվում՝ Չեմպիոնների Լիգայի եզրափակիչը։
Մենք կդիմենք Չեմպիոնների Լիգայի 2028 թվականի եզրափակիչն ընդունելու նոր մարզադաշտում»,- Կոբախիձեի խոսքերն է մեջբերում ՏԱՍՍ-ը։