«Ռոմայի» հարձակվող Էլդոր Շոմուրոդովն արդեն մերժել է արտասահմանյան երեք ակումբների առաջարկները։ Լրագրող Նիկոլո Շիրայի խոսքով՝ ֆուտբոլիստը կցանկանար մնալ Ա Սերիայում, նրան չեն գրավում այլ առաջնություն տեղափոխվելու տարբերակները։
Նշենք, որ Շոմուրոդովը ներկայումս դժգոհ է «Ռոմայում» խաղային պրակտիկայի քանակից։ Ֆուտբոլիստը ցանկանում է տեղափոխվել այնպիսի թիմ, որն իրեն երաշխավորում է տեղ առաջին թիմում և, համապատասխանաբար, ավելի շատ խաղային րոպեներ։
Այս մրցաշրջանում Ռոստովի նախկին հարձակվողը 6 հանդիպում է անցկացրել իտալական Ա Սերիայում, որտեղ ուզբեկը ոչ մի արդյունավետ գործողություն չի կատարել։ Նախկինում ֆուտբոլիստը հանդես է եկել «Ջենոայում», որտեղից մեկ տարի առաջ է տեղափոխվել «Ռոմա»։
