Հայաստանի հավաքականի կիսապաշտպան Վահան Բիչախչյանն ամփոփել է լեհական «Պոգոնի» կազմում Թուրքիայի Բելեկ քաղաքում անցկացրած ուսումնամարզական հավաքը:
Երեք հանդիպումների մասին
«Այդ երեք հանդիպումներն օգնեցին մեզ հնարավորինս լավ նախապատրաստվել մրցաշրջանի երկրորդ հատվածին։ Թիմն ավարտել է ուսումնամարզական հավաքը և վերադառնում է Լեհաստան:
Շատ դժվար աշխատանքային 10 օր է մնացել մեր հետևում։ Մենք ոչ միշտ էինք խաղում, բայց գրեթե ամեն օր քրտնաջան մարզվում էինք։ Այժմ մեզ սպասվում է մի քանի հանգստյան օր, որը պետք է օգտագործենք լիարժեք վերականգնման համար։ Կարծում եմ՝ 100 տոկոսով պատրաստ կլինենք «Վիձևի» դեմ հանդիպմանը:
Այստեղ անցկացրած յուրաքանչյուր խաղում մենք կատարյալ տեսք չունեինք: Բայց հարցը դա չէր։ Ամենակարևորն այն է, որ օպտիմալ մարզավիճակում ենք մոտենում առաջնության խաղերին։ Թուրքիայում կայացած երեք հանդիպումներից յուրաքանչյուրը լավ փորձ էր մեզ համար, և մենք կարող ենք դասեր քաղել դրանցից յուրաքանչյուրից»:
Ադրբեջանի չեմպիոն «Քարաբաղի» դեմ խաղի մասին
«Ինչ վերաբերում է իմ անհատական վերաբերմունքին, ապա պետք է ասեմ, որ ինձ անհրաժեշտ էին այն րոպեները, որոնք ունեի խաղադաշտում անցկացնելու։ Դրանք ինձ համար անհրաժեշտ էին առաջնության վերսկսումից առաջ մարզավիճակ ձեռք բերելու համար։ Այդ խաղում ժամանակից շուտ հեռացա խաղադաշտից, բայց չեմ կարծում, որ վնասվածքս լուրջ է։ Մենք տեղեկություն կստանանք ավելի ուշ, երբ ես մի քանի այլ հետազոտություն կանցնեմ: Այնուամենայնիվ, ես հավատում եմ, որ կլինեմ մարզչական շտաբի տրամադրության տակ «Վիձևի» դեմ հանդիպմանը»:
Առաջնության երկրորդ հատվածի մասին
«Մենք շատ ոգևորված ենք, որ պետք է վերսկսենք ելույթները առաջնությունում: Դա հիանալի է յուրաքանչյուր խաղացողի և նաև երկրպագուների համար: Մենք անհամբերությամբ սպասում ենք, թե երբ կանցկացնենք հաջորդ հանդիպումը սեփական մարզադաշտում: Մեր մարզադաշտում միշտ զարմանալի մթնոլորտ է, և մենք վաղուց այն զգալու հնարավորություն չենք ունեցել։ Մենք դա ենք ուզում։ Աշնանային տուրի յուրաքանչյուր խաղում քրտնաջան աշխատում ենք հաղթանակի հասնելու համար»,- 23-ամյա ֆուտբոլիստի խոսքը մեջբերում է ակումբի մամուլի ծառայությունը:
