Ֆրանսիայի հավաքականի նախկին կենտրոնական պաշտպան Ուիլյամ Գալասը բացատրել է, թե ինչու Մադրիդի «Ռեալը» թույլ չի տվել ֆրանսիացի հարձակվող Կիլիան Մբապպեին մասնակցել Փարիզի Օլիմպիական խաղերին։
«Որպես խաղացող իմ երազանքն էր հաղթել Չեմպիոնների Լիգան, Աշխարհի գավաթը, Եվրոպայի առաջնությունը, Պրեմիեր Լիգան և Լիգա 1-ը, բայց Մբապպեի նման խաղացողները նույնպես երազում են Օլիմպիական խաղերում խաղալու մասին։
Ցավալի է, որ նա հնարավորություն չունի մասնակցելու այս մրցաշարին, քանի որ Օլիմպիական խաղերն առանձնահատուկ բան են։ Նախկինում դա հնարավոր էր, բայց ֆուտբոլը փոխվել է, և մեծ գումարներ են ծախսվել Մբապպեի վրա։
Եթե նայեք իրավիճակին Մադրիդի «Ռեալի» տեսանկյունից, ապա ակումբը չի ցանկանում, որ Մբապպեն վնասվածք ստանա։ «Ռեալը» չի կարող գնալ այդ ռիսկին՝ բաց թողնելով նրան: Ես հասկանում եմ իրավիճակի երկու կողմն էլ, բայց այս դեպքում խոսքը չափազանց մեծ գումարների մասին է»,- Գալասի խոսքերն է մեջբերում Give me Sport-ը։
