«Լիվերպուլի» հոլանդացի պաշտպան Վիրջիլ վան Դեյկը հայտնել է, որ լիովին նվիրված է մերսիսայդյան ակումբին և հենց հիմա կենտրոնացած է 2023/2024 մրցաշրջանի վրա։
«Շատ առումներով իմ խոսքերը հանվել են կոնտեքստից: Ես սիրում եմ այս ակումբը, սիրում եմ երկրպագուներին։ Հինգ օր առաջ մենք նույնիսկ չէինք խոսում իմ պայմանագրի մասին, ուստի սա հիմարություն է: Ես ամբողջովին կենտրոնացած եմ այս տարին մեզ համար յուրահատուկ դարձնելու վրա: Ակնհայտ է, որ վերջին լուրերը ցնցել են բոլորիս։ Ես նույնն էի զգում, ինչ երկրպագուները։
Բայց մենք լրջորեն ենք վերաբերվում այս հարցին: Մենք ցանկանում ենք հաջողության հասնել, ցանկանում ենք հասնել նրան, ինչի մասին երազում էինք մրցաշրջանի սկզբում։ Հավատացեք ինձ, ես լիովին նվիրված եմ ակումբին։ Ես դրա կապիտանն եմ: Այս մրցաշրջանում մենք ամեն ինչ տալու ենք: Մենք կտեսնենք, թե դա ուր կտանի», – վան Դեյկի խոսքերն է մեջբերում Liverpool Echo-ն։
Հիշեցնենք, որ այս շաբաթվա սկզբին պաշտպանն ասել էր, որ չգիտի, թե ինչ ապագա կունենա մերսիսայդյան ակումբում։
