«Բարսելոնայի» գլխավոր մարզիչ Չավին մեկնաբանել է Չեմպիոնների Լիգայի քառորդ եզրափակչի առաջին խաղում ՊՍԺ-ի նկատմամբ արտագնա հաղթանակը (3:2)։
«Ես շատ հպարտ եմ իմ թիմով: Եթե հիմա հպարտ չես զգում, ապա ե՞րբ կզգաս: Կարծում եմ՝ ՊՍԺ-ն, հավանաբար, դեռ կմնա մեր զույգի ֆավորիտը։ Նրանք ֆանտաստիկ թիմ են, բայց այսօր մեզ հաջողվեց սահմանափակել նրանց ազդեցությունը. մենք փորձեցինք ստիպել նրանց խաղալ եզրերից, և դա մեզ հաջողվեց: Հատկապես առաջին խաղակեսում մենք շատ լավ, հիանալի և բարձր պրեսինգ էինք անում։
Շատ դժվար է պաշտպանվել փարիզյան թիմի դեմ, բայց կարծում եմ, որ մենք այսօր լավ աշխատանք կատարեցինք: Մենք գիտեինք, որ երկար ժամանակ անց քառորդ եզրափակիչ վերադառնալը մեծ հնարավորություն էր, և բոլորը խաղում էին դրա մտքով: Իմ տղաները հավատում էին իրենց։ Բայց դեռ ոչինչ չի արվել։
Մեր պաշտպանությունը հասկացավ, թե ինչ է պետք անել։ Շատ էին անհատական պայքարները։ Լամին Յամալը և Ռաֆինյան մեր լավագույն ֆուտբոլիստներն էին այսօր: Մենք գիտենք, որ ՊՍԺ-ն ուժեղ է անհատապես։ Բայց մենք լավ աշխատանք կատարեցինք ինչպես հարձակման գծում, այնպես էլ պաշտպանությունում:
Մենք կարծում էինք, որ ՊՍԺ-ն ֆավորիտ է, բայց պաշտպանությունում լավ աշխատանք կատարեցինք: Մենք լավ էինք սեղմում, և ընդհանուր առմամբ ես գոհ եմ մեր արածից: Կարծում եմ՝ «Բարսելոնայի» երկրպագուները կարող են գոհ լինել նրանով, ինչին մենք հասել ենք։ Հիմա ժամանակն է մտածել պատասխան խաղի մասին։
Ես «Բարսայի» երկրպագու եմ, ուրախ եմ, բայց սա ճանապարհի վերջը չէ: Մենք դեռ շատ անելիքներ ունենք»,- Չավիի խոսքերն է մեջբերում ՈւԵՖԱ-ի մամուլի ծառայությունը։
