ՖԻՖԱ-ն և ՈւԵՖԱ-ն կարող են պատժամիջոցներ կիրառել «Բարսելոնայի» նկատմամբ՝ մրցավարներին կաշառելու դեպքի պատճառով։
Հիշեցնենք, որ կատալոնական ակումբը 2016-ից 2018 թվականներին Իսպանիայի մրցավարական կոմիտեի փոխնախագահ Խոսե Մարիա Էնրիկես Նեգրեյրային վճարել է 1,4 միլիոն եվրո: Այնուհետև հայտնի դարձավ, որ «Բարսելոնան» 2003 թվականից Նեգրեյրային վճարել է 4,7 միլիոն եվրո։ Կաշառքները 2016-ից 2018 թվականներին կազմել են նրա ընկերության շրջանառության 95%-ը։ Այնուհետև նրանք հայտնել են, որ «Բարսելոնան» 2001 թվականից ի վեր Նեգրեյրային վճարել է 6,66 միլիոն եվրո։
Քանի որ սպորտի մասին իսպանական օրենքը սահմանում է, որ լուրջ խախտումների համար վաղեմության ժամկետը երեք տարի է, իսկ «Բարսելոնան» Էնրիկես Նեգրեյրային վերջին վճարումը կատարել է 2018 թվականին, ակումբը չի կարող պատժամիջոցի ենթարկվել իսպանական կազմակերպությունների կողմից։
Այնուամենայնիվ, պատիժը կարող է լինել ՈՒԵՖԱ-ի և ՖԻՖԱ-ի կողմից: Նրանք կարող են պատժամիջոցներ կիրառել ակումբի նկատմամբ, եթե ապացուցվի խարդախությունը:
ՖԻՖԱ-ի Կարգապահական Կանոնակարգի 27-րդ հոդվածի 6-րդ կետը սահմանում է. «ՖԻՖԱ-ի դատական մարմինն իրեն իրավունք է վերապահում հետաքննել, հետապնդել և պատժել լուրջ խախտումները, որոնք մտնում են սույն օրենսգրքի և կոնֆեդերացիաների, ֆեդերացիաների կամ այլ մարզական կազմակերպությունների իրավասության մեջ»:
Մարզական իրավաբանները պնդում են, որ ՖԻՖԱ-ն իրավունք ունի պատժել «Բարսային» և զրկել նրանց մրցաշարերից, եթե ապացուցվի ակումբի մեղքը:
Համաձայն ՈւԵՖԱ-ի մրցաշարերի կանոնների 4.02-րդ և 4.03-րդ հոդվածների՝ միությունը կարող է պատժել «ցանկացած գործողություն, որն ուղղված է ազգային կամ միջազգային մակարդակով խաղի արդյունքի վրա ազդելուն» և նշված ակումբին մեկ մրցաշրջանով կասեցնել միջազգային մրցաշարերի մասնակցությունից:
