Հայտնի են դարձել Ֆուտբոլի միջազգային ֆեդերացիայի (ՖԻՖԱ) վարկածով 2022 թվականի լավագույն դարպասապահի կոչման երեք հավակնորդները:
ՖԻՖԱ-ի մամուլի ծառայության հաղորդմամբ՝ մրցանակին հավակնում են Տիբո Կուրտուան («Ռեալ», Բելգիա), Յասին Բունուն («Սևիլիա», Մարոկկո) և Էմիլյանո Մարտինեսը («Ասթոն Վիլա», Արգենտինա)։
Ալիսոնը («Լիվերպուլ», Բրազիլիա) և Էդերսոնը («Մանչեսթեր Սիթի», Բրազիլիա) դուրս են մնացել մրցանակի հավակնորդների ցուցակից:
Երեք հավակնորդներն ընտրվել են միջազգային ժյուրիի կողմից, որի կազմում ընդգրկված են ազգային հավաքականների մարզիչներ և ավագներ, լրագրողներ ու երկրպագուներ, որոնք քվեարկել են ՖԻՖԱ-ի պաշտոնական կայքում:
Հաղթողի անունը հայտնի կդառնա փետրվարի 27-ին Ֆրանսիայի մայրաքաղաք Փարիզում նախատեսված մրցանակաբաշխության ժամանակ:
