«Բարսելոնայի» և Բրազիլիայի հավաքականի նախկին պաշտպան Դանի Ալվեշը մեծ խնջույք է կազմակերպել՝ նշելու բանտից ազատվելը։

Ֆուտբոլիստը ձերբակալվել էր անցյալ տարվա հունվարին՝ բռնաբարության մեղադրանքով։ 2024 թվականի փետրվարին դատարանը նրան դատապարտեց 4,5 տարվա ազատազրկման, սակայն խաղացողի պաշտպանությունը վերաքննիչ բողոք ներկայացրեց, որի ընթացքում դատարանը թույլ տվեց նրան հեռանալ բանտից 1 միլիոն եվրոյի չափով գրավի դիմաց։ Միևնույն ժամանակ Ալվեշից պահանջվել է հանձնել իր երկու անձնագրերը՝ իսպանական և բրազիլական, և ամեն շաբաթ ներկայանալ դատարան։

Բրազիլացին ազատ է արձակվել բանտից երկուշաբթի օրը՝ մարտի 25-ին։

Ինչպես հայտնում է Daily Mail-ը՝ հղում անելով իսպանական ԶԼՄ-ներին, ազատ արձակման հաջորդ օրը նա հավաքել է ընտանիքին ու ընկերներին Բարսելոնայի արվարձանում գտնվող Էսպլուգես դե Լյոբրեգատ քաղաքի իր տանը։ Իսկ ընթրիքից հետո ընկերությունը ուղևորվեց Ալվեշի վիլլա, որտեղ նրանք շարունակեցին տոնակատարությունը՝ ենթադրաբար մինչև առավոտյան ժամը 5-ը։