Ֆրանսիայի հավաքականի հարձակվող Կիլիան Մբապպեն հայտնել է, որ դեռ ակնկալում է մասնակցել Օլիմպիական խաղերին։
«Ես միշտ ցանկացել եմ խաղալ Օլիմպիական խաղերում, և ցանկությունս չի փոխվել: Եթե ես կարողանամ խաղալ, դա երազանք կլինի, բայց եթե ինձ թույլ չտան, ես կանեմ այն, ինչ ինձ կասեն։ Որոշումը դեռ կախված է մեկ անձից, և նա ինձ չի ասել «այո» կամ «ոչ»», – Մբապպեի խոսքերն է մեջբերում լրագրող Ֆաբրիցիո Ռոմանոն։
Ավելի վաղ հայտնի էր դարձել, որ Մբապպեն կարող է բաց թողնել Օլիմպիական խաղերը Մադրիդի «Ռեալ» տեղափոխվելու պատճառով։ Ինչպես հայտնում է L’Equipe-ը, մադրիդցիների ղեկավարությունը չի ցանկանում հարձակվողին որևէ տեղ բաց թողնել թիմում իր առաջին մրցաշրջանում։
25-ամյա Մբապպեն Ֆրանսիայի հավաքականի հետ 2018 թվականին դարձել է աշխարհի չեմպիոն, ինչպես նաև 2020/21 մրցաշրջանում ՈւԵՖԱ-ի Ազգերի լիգայի հաղթող։
