Ֆրանսիայի հավաքականի և ՊՍԺ-ի հարձակվող Կիլիան Մբապպեն, ում ապագան վաղուց էր կապում Մադրիդի «Ռեալի» հետ, կարող է իսպանական ակումբ տեղափոխվել միայն մեկ պայմանով։
Իսպանական հայտնի COPE հրատարակության համաձայն՝ ֆրանսիացու տեղափոխությունը ակումբ հնարավոր է միայն այն դեպքում, եթե Մբապպեի մայրն անձամբ զանգահարի Մադրիդի «Ռեալի» նախագահ Ֆլորենտինո Պերեսին և տեղեկացնի որդու պատրաստակամության և ակումբ տեղափոխվելու ցանկության մասին։ Մբապպեի թիմը նույնպես պետք է հրաժարվի աշխատավարձի պահանջներից՝ մոռանալով Մադրիդի «Ռեալի» տարեկան 25 միլիոն եվրո աշխատավարձի առաջարկը 2022 թվականին և համաձայնվելով 15 միլիոն եվրո աշխատավարձի։
Աղբյուրը հայտնում է, որ մադրիդյան թիմը պատրաստ չէ ֆուտբոլիստին առասպելական հոնորար վճարել, քանի որ վերջերս ակումբին են միացել Ջուդ Բելինգհեմը, ով դարձել է «Ռեալի» առաջատարներից մեկը և Էնդրիկը, ում վրա մեծ հույսեր են կապում։
Ավելի վաղ հաղորդվում էր, որ Մադրիդի «Ռեալը» չի պատրաստվում համոզել Մբապպեին պայմանագիր կնքել ակումբի հետ։
