«Յուվենտուսը» պաշտոնական հայտարարություն է տարածել 2023/24 մրցաշրջանի եվրոպական մրցաշարերին մասնակցելուց զրկելու վերաբերյալ։ Թուրինյան ակումբը չի բողոքարկի ՈՒԵՖԱ-ի որոշումը։
«Մենք ցավում ենք ՈՒԵՖԱ-ի ակումբի ֆինանսական վերահսկողության մարմնի որոշման համար։ Մենք չենք կիսում տրված մեկնաբանությունը և հաստատապես համոզված ենք մեր գործողությունների օրինականության և մեր փաստարկների հիմնավորվածության մեջ։ Սակայն մենք որոշել ենք չբողոքարկել այս որոշումը։ Այս որոշումը համահունչ է Իտալիայի ֆուտբոլի ֆեդերացիայի հետ վեճերի համատեքստում անցած մայիսին ընդունված որոշմանը։
Ինչպես այս դեպքում, մենք նախընտրում ենք վերջ տալ այս անորոշ ժամանակաշրջանին և ապահովել լիարժեք թափանցիկություն և վստահություն մեր ներքին և արտաքին շահագրգիռ կողմերին՝ կապված ապագա միջազգային մրցաշարերին ակումբի մասնակցության հետ: Բողոքարկումը, հնարավոր է այլ ատյաններին, անորոշ արդյունքներով և ժամկետներով, կմեծացնի անորոշությունը՝ կապված 2024/25 մրցաշրջանում Չեմպիոնների Լիգային մեր հնարավոր մասնակցության հետ:
Փոխարենը, մենք ցանկանում ենք, որ առաջին թիմը, մեր աջակիցները, մեր հովանավորները, մատակարարները և ֆինանսական գործընկերները կարողանան անցկացնել 2023/24 մրցաշրջանը մտքի առավելագույն հանգստությամբ և վստահությամբ՝ խաղադաշտում արդյունքների հասնելու համար, հատկապես անցած բուռն մրցաշրջանից հետո։
Չնայած այս ցավալի որոշմանը, մենք այժմ կարող ենք դիմակայել նոր մրցաշրջանին՝ կենտրոնանալով խաղադաշտի վրա: Այժմ մենք մեր ուշադրությունը կկենտրոնացնենք առաջնության և Իտալիայի գավաթի վրա։ Կանենք ամեն ինչ, որպեսզի մեր երկրպագուներին առավելագույն հաճույք պատճառենք այս մրցումներից»,- ակումբի նախագահ Ջանլուկա Ֆերերոյի խոսքերն է մեջբերում «Յուվենտուսի» մամուլի ծառայությունը:
Անցած մրցաշրջանում «Յուվենտուսը» ավարտեց 7-րդ տեղը Ա Սերիայի մրցաշարային աղյուսակում և պետք է հանդես գար Կոնֆերենց լիգայում: Սակայն խախտումների պատճառով բյանկոներիները մեկ տարով դուրս մնացին եվրոպական մրցաշարերից և տուգանվեցին 20 միլիոն եվրոյով։
