Արդա Գյուլերը, ով վերջերս է համալրել Մադրիդի «Ռեալը», մոտ էր «Բարսելոնա» տեղափոխվելուն: Դեկուն անձամբ է բանակցել 18-ամյա կիսապաշտպանի հետ, կատալոնացիներն արդեն ամեն ինչ պայմանավորվել էին «Ֆեներբախչեի» հետ, սակայն վերջին պահին Գյուլերը պայման դրեց, որն անհնարին դարձավ «կապտանռնագույնների» համար, և որին «Ռեալը» հեշտությամբ համաձայնեց։
«Ինչո՞ւ «Ռեալում»: «Ռեալում» ինձ վստահեցնում էին, որ կխաղամ, և ամեն ինչ որոշված էր: Վարձավճարով տեղափոխվելն իմ ծրագրերում չէր»,- Marca-ն է մեջբերում Գյուլերը:
Որոշումն իսկապես արագ է կայացվել։ Օրեր առաջ Մադրիդի «Ռեալի» գլխավոր մարզիչ Կառլո Անչելոտտին տեղեկացավ, որ հնարավորություն կա ձեռք բերել եվրոպական ֆուտբոլի ամենախոստումնալից կիսապաշտպաններից մեկին։ Մարզչին ասել են, որ գործարքը գրեթե ավարտված է, մնացել է միայն անձամբ Անչելոտտիի հավանությունը։
Ֆուտբոլիստի համար միակ անփոխարինելի պայմանը ցանկությունն էր այս ամառ լքել «Ֆեներբախչեն» և վարձակալության պայմանագրով ևս մեկ մրցաշրջանով Թուրքիա չվերադառնալ։ Անչելոտտիին տեսանյութ են ուղարկել Գյուլերի մասին, իսկ Կառլոն, առանց հապաղելու, անձամբ է զանգահարել նրան՝ թիմ հրավիրելու համար։ Ավելին, մարզիչը համոզմունք հայտնեց, որ Արդան իր պահեր ստեղծելու և գոլեր խփելու տաղանդով պետք է ավելի մոտ խաղա մրցակցի դարպասին։
