ՀՀ կառավարության ռազմավարության մեջ խնդիր ենք ձևակերպել մինչև 2050 թվականն ունենալ 25 օլիմպիական ոսկե մեդալ, իսկ ֆուտբոլի Հայաստանի հավաքականը դառնա Եվրոպայի կամ աշխարհի առաջնության մրցանակակիր։ Այդ մասին դեկտեմբերի 15-ին կառավարության նիստում հայտարարել է ՀՀ վարչապետ Նիկոլ Փաշինյանը:
«Այս տարվա լավ ցուցանիշներն ի ցույց են դնում, որ երբ պետությունն աջակցություն է ցուցաբերում, ոլորտը արագ արձագանքում է»,- նշել է ՀՀ վարչապետը:
Անդրադառնալով միջազգային մրցաշարերում հաղթող կամ մրցանակակիր դարձած մարզիկների պարգևավճարների կրկնապատկմանը՝ Նիկոլ Փաշինյանը նշել է, որ աշխարհի չեմպիոնը միանվագ ստանալու է 10 միլիոն դրամ (նախկին 5-ի փոխարեն), իսկ Եվրոպայի չեմպիոնը՝ 6 միլիոն դրամ (նախկին 3-ի փոխարեն):
«ՀՀ կառավարության մինչև 2050 թվականի ռազմավարության մեջ խնդիր ենք դրել, որ ՀՀ ֆուտբոլի հավաքականը դառնա Եվրոպայի կամ աշխարհի առաջնության մրցանակակիր, որն իրագործելի ծրագիր է։ Բայց դրա համար մենք պետք է հասկանանք, թե ինչ պետք է անենք։ Իրատեսականությունը խիստ հաշվարկելի է։ Դա կախված է նրանից, թե մենք ինչ ենթակառուցվածքներ ունենք, քանի երեխա է զբաղվում ֆուտբոլով»,- նշել է ՀՀ վարչապետը։
