«Բարսելոնայի» նախագահ Ժոան Լապորտան ասել է, որ կատալոնական ակումբը պատրաստ է այս ամառ նոր պայմանագիր առաջարկել հարձակվող Ուսման Դեմբելեին:
«Ուսմանը գիտի մեր պայմանները, և որ մենք միշտ ցանկացել ենք, որպեսզի նա մնա: Հուսով եմ, որ մրցաշրջանի վերջում նա կվերանայի իր որոշումը»,- Լապորտայի խոսքերն է մեջբերում Cadena SER-ը։
Ավելի վաղ 24-ամյա խաղացողը հրաժարվել էր երկարաձգել «կապտանռանգույնների» հետ պայմանագիրը, որն ավարտվում է 2022 թվականի հունիսի 30-ին։
Դրանից հետո Լապորտան քննադատել էր ֆրանսիացի ֆուտբոլիստին ու ցանկացել հեռացնել վերջինիս, սակայն թիմի գլխավոր մարզիչ Չավին համոզել էր նրան կտրուկ որոշումներ չկայացնել։
Այս մրցաշրջանում Դեմբելեն անցկացրել է 16 խաղ, որոնցում դարձել է 2 գոլի և 5 գոլային փոխանցման հեղինակ։
