City Football Group (CFG) հոլդինգը, որին պատկանում է «Մանչեսթեր Սիթին», կարող է ձեռք բերել Մոսկվայի «Սպարտակի» բաժնետոմսերի մի մասը, գրում է Baza telegram-ալիքը։

Աղբյուրի համաձայն՝ ընկերությունը բանակցություններ է վարում «Սպարտակի» սեփականատերերի հետ՝ ակումբի բաժնետոմսերի մոտավորապես 20%-ի ձեռքբերման շուրջ։

Այժմ Մոսկվայում են CFG-ի երեք բրիտանական ներկայացուցիչներ։ Նրանք կարմիր-սպիտակների գլխավոր տնօրեն Եվգենի Մելեժիկովի ընկերակցությամբ այցելել են «Սպարտակ»-«Ռոստով» հանդիպմանը, ինչպես նաև զննել ակումբի բազան և գրասենյակը։ Վերջերս բրիտանացի մենեջերները մի շարք հանդիպումներ են անցկացրել մոսկովյան ակումբի տարբեր ուղղությունների ղեկավարների հետ։

Գործարքով շահագրգռված են երկու կողմերը։ CFG-ն հետաքրքրված է ռուսական շուկայով, իսկ «Սպարտակը» ընկերության հետ համագործակցության մեջ տեսնում է հովանավորչական հավելյալ հնարավորություններ, ինչպես նաև հետաքրքրված է միասնական սկաուտական ​​ցանցով։

Եթե ​​գործարքը կայանա, ակումբի անվանումն ու բրենդը կմնան նույնը:

City Football Group հոլդինգը ներառում է 11 ակումբ։