«Էսպանյոլի» երկրպագուն, որը ռասիստական վիրավորանքներ էր հասցրել «Ատլետիկ Բիլբաոյի» հարձակվող Ինյակի Ուիլյամսին, դատապարտվել է մեկ տարվա ազատազրկման, հայտնում է AFP-ն։
Տղամարդը մեղադրվել է 2020 թվականի հունվարին կատալոնական թիմի տնային մարզադաշտում ֆուտբոլիստի վրա ռասիստական ժեստեր անելու և գոռալու մեջ։
Իսպանական օրենսդրության համաձայն՝ նա չի կրի իր պատիժը բանտում, քանի որ պատիժը երկու տարուց պակաս է, և նա նախկինում դատվածություն չունի։ Երկրպագուին տուգանել են 1000 եվրոյով և արգելել են երեք տարով մուտք գործել ֆուտբոլային մարզադաշտեր։
«Այսօրվա որոշումը ևս մեկ կարևոր քայլ է ֆուտբոլում ռասիզմի դեմ պայքարում և մարզադաշտերի ներսում և դրսում բռնության բոլոր ձևերի վերացման գործում», – ասվում է Լա Լիգայի հայտարարության մեջ։
Վերջին տարիներին իսպանական ֆուտբոլը բազմաթիվ ռասիստական միջադեպերի է ենթարկվել։
