«Ինտերը» կարող է դժվարությունների հանդիպել Հաքան Չալհանօղլուի իրավիճակի և Լաուտարո Մարտինեսի խոսքերի պատճառով:
Աշխարհի առաջնության 1/8 եզրափակչում «Ֆլումինենսեից» կրած պարտությունից (0:2) հետո թիմի ավագ Մարտինեսը հարցազրույցում ասել է, որ թիմի որոշ խաղացողներ «չեն ցանկանում խաղալ ակումբի համար» և կոչ է արել նման մարդկանց հեռանալ:
Մի փոքր անց «Ներաձուրիի» նախագահ Ջուզեպպե Մարոտան ավելի ցնցող հայտարարություն է արել. «Լաուտարոն խոսել է Չալհանօղլուի մասին»: Լրագրող Պասկուալե Գուարոյի խոսքով՝ դրանից հետո թիմում կոնֆլիկտ է առաջացել. ոմանք աջակցել են թիմի ավագին, բայց խաղացողների զգալի մասը պաշտպանել է Չալհանօղլուին՝ պնդելով, որ նման հարցերը չպետք է հանրությանը ներկայացվեն:
Ինչպես հայտնի է, «Գալաթասարայը» հետաքրքրություն է ցուցաբերում թուրք ֆուտբոլիստի նկատմամբ: Ստամբուլյան ակումբը տեղյակ է իրավիճակին և կարծում է, որ «Ինտերի» հանդերձարանում կոնֆլիկտը կսրվի, երբ Չալհանօղլուն վերադառնա արձակուրդից, ուստի միլանցիները, հնարավոր է, ստիպված լինեն բաց թողնել կիսապաշտպանին ոչ այնքան բարենպաստ պայմաններով։
