Հայաստանի հավաքականի կիսապաշտպան Էդուարդ Սպերցյանի՝ «Կրասնոդարից» «Այաքս» տեղափոխության հնարավոր գործարքը ներկայումս բացառված է։ Այս մասին հայտնել է առաջատար ESPN հրատարակությունը։

Աղբյուրի փոխանցմամբ՝ հոլանդական ակումբը չի կասկածում «Ցուլերի» առաջատարի ֆուտբոլային հմտությունների վրա, սակայն Ամստերդամի թիմի ղեկավարությունը տարաձայնություններ ունի Ռուսաստանի Պրեմիեր Լիգայի ֆուտբոլիստների հետ կնքված գործարքների վերաբերյալ։

Նշվում է, որ այս դեպքում խոսքը քաղաքական պատճառների մասին է։

Սպերցյանը «Կրասնոդարի» սան է։ ՌՊԼ-ի նախորդ մրցաշրջանում ֆուտբոլիստը մասնակցել է 28 խաղի, որոնցում խփել է 11 գոլ և կատարել յոթ գոլային փոխանցում։ Ֆուտբոլիստի ներկայիս պայմանագիրը ակումբի հետ ուժի մեջ է մինչև 2026 թվականի ամառը։ Ֆուտբոլիստի գնահատված արժեքը, ըստ Transfermarkt ինտերնետային պորտալի, կազմում է 25 միլիոն եվրո։