Սաուդյան Արաբիայի ակումբները դեռ ցանկանում են ձեռք բերել Մադրիդի «Ռեալի» վինգեր Վինիսիուս Ժունիորին 2025 թվականի ամռանը։

Այս մասին հայտնում է լրագրող Բեն Ջեյքոբսը։

Աղբյուրի համաձայն՝ ֆուտբոլիստի և Սաուդյան Արաբիայի Պրո լիգայի ներկայացուցիչների միջև շփումները դեռևս ակտիվ են, չնայած այն հանգամանքին, որ բրազիլացի ֆուտբոլիստը բազմիցս ցանկություն է հայտնել խաղալ «Ռեալում»։

Նշվում է, որ խոսվում է ֆուտբոլիստի՝ «Ալ-Ահլի» հնարավոր տեղափոխության մասին, որն ամենամեծ հետաքրքրությունն է ցուցաբերում ֆուտբոլիստի նկատմամբ։

Ֆուտբոլիստի գործող պայմանագիրը մադրիդյան ակումբի հետ ավարտվում է 2027 թվականի ամռանը։ Այս մրցաշրջանում Վինիսիուսը 44 խաղում դարձել է 19 գոլի և 11 գոլային փոխանցման հեղինակ։