«Մանչեսթեր Յունայթեդի» ավագ և Պորտուգալիայի հավաքականի կիսապաշտպան Բրունո Ֆերնանդեշը հայտնել է, որ մտածում է կարիերան Ավստրալիայում շարունակելու մասին։
Հիշեցնենք, որ «Մանչեսթեր Յունայթեդի» նրա նախկին թիմակից Խուան Մատան այժմ խաղում է ավստրալական «Վեստերն Սիդնեյ Ուոնդերերս» ակումբում:
«Այն տեսանյութերից հետո, որոնք Մատան ուղարկում է ինձ իր ապրելակերպի, գոլֆ խաղալու, լողափի, մարզադաշտի, երկրպագուների, ակումբի պայմանների և մնացած ամեն ինչի մասին, ես կարող եմ մտածել այս տարբերակի մասին։ Եթե մինչ այդ նա դեռ այնտեղ է ապրում, դա էլ ավելի լավ տարբերակ կլինի։ Նա ինձ խոստովանեց, որ սիրահարված է երկրին ու մշակույթին։
Մատան ասաց ինձ, որ կարող է զղջալ, որ իր կարիերայի սկզբում Ավստրալիա չի եկել: Նա է, ով կարող է ասել, թե որքան երջանիկ է մարդը այդ վայրում, և ես կարծում եմ, որ Խուանը իսկապես երջանիկ է հենց հիմա այնտեղ գտնվելու համար: Նա ինձ միայն լավ բաներ է ասում։
Ակնհայտ է, որ ես Սուրբ Ծնունդն անցկացրել եմ այստեղ, որտեղ քամոտ ու ցուրտ էր, և նա ինձ ուղարկում էր արևոտ տեսանյութեր, որտեղ նա ապրում էր լողափի դիմաց»,- ասել է Ֆերնանդեսը Optus Sport-ին:
30-ամյա պորտուգալացու պայմանագիրը «Մանչեսթեր Յունայթեդի» հետ նախատեսված է մինչև 2027 թվականի ամառը։
