«Բարսելոնայի» դարպասապահ Վոյցեխ Շչեսնին բացատրել է, թե ինչպես է վերաբերվում այն փաստին, որ անցյալ հոկտեմբերին կատալոնական ակումբին միանալուց հետո չի մասնակցել թիմի ոչ մի հանդիպման։
Ավելի վաղ հաղորդվում էր, որ լեհ դարպասապահը դժգոհ է կատալոնական ակումբի ճամբարում իր խաղաժամանակից։
«Ի սկզբանե ասել էի, որ պետք է մարզավիճակ ձեռք բերեմ, դա ամենակարևորն էր։ Հիմա ես ինձ լիովին պատրաստ եմ զգում խաղալու ֆիզիկական և հոգեկան տեսանկյունից։ Չեմ թաքցնում նաև, որ եթե ես լինեի «Բարսելոնայի» մարզիչը, ինձ կտայի նույնքան խաղաժամանակ, որքան իրականում ստացել էի։ Այդ իսկ պատճառով ես դժվարանում եմ տխրել մի իրավիճակից, որը ես 100%-ով հասկանում եմ։
Նույնիսկ թիմի համար ամենավատ պահին, երբ լրատվամիջոցները փորձեցին ճնշում գործադրել, ես առաջինն էի, որ ասացի, որ Ինյակի Պենյան արժանի է լիարժեք վստահության և լավ մակարդակով է խաղում։ Ես այլ կերպ եմ նայում այս իրավիճակին՝ լինելով արդեն կարիերաս ավարտած ֆուտբոլիստ։ Ես զգում եմ, որ կարող եմ ամեն ինչ գնահատել ավելի օբյեկտիվ և ավելի քիչ եսասիրական։ Գուցե դա է պատճառը, որ ես չեմ տխրում»,- Շչեսնիի խոսքերն է մեջբերում Sport.pl-ը։
