«Ինտերի» գլխավոր մարզիչ Սիմոնե Ինձագին խոսել է Ա Սերիայի 16-րդ տուրի «Լացիոյի» հետ առաջիկա հանդիպման մասին, ինչպես նաև հռոմեացիներին անվանել չեմպիոնության հավակնորդներից մեկը։
«Դժվար հանդիպում է լինելու, քանի որ մենք մրցում ենք մի թիմի հետ, որն այս մրցաշրջանում հաղթել է 22 պաշտոնական հանդիպումներից 16-ում, և երբ նրանք չեն հաղթել, դեռ շատ լավ են խաղացել:
Պետք է արժանին մատուցել բոլորին՝ ակումբին, մարզչին և ֆուտբոլիստներին։ Բարոնին հիանալի բաներ է անում, թիմը կազմակերպված է, և նրանք իսկապես լավ ֆուտբոլ են ցուցադրում: Արդար է, որ բոլորը գիտակցեն, թե որքան լավ են խաղում:
Ես ասացի մրցաշրջանի սկզբում, որ սա շատ հավասարակշռված մրցաշրջան է լինելու: Իմ կարծիքով՝ ճիշտ է, որ «Լացիոյին» դիտարկում ենք Սկուդետտոյի համար պայքարում։ Բացի ներկայիս դիրքից, ես տպավորված եմ նրանց խաղաոճով, կազմակերպվածությամբ, և դա նրանց դնում է չեմպիոնության հավակնորդների թվում»,- Ինձագիի խոսքերն է մեջբերում Football Italia-ն։
