Մադրիդի «Ատլետիկոյի» գլխավոր մարզիչ Դիեգո Սիմեոնեն շնորհակալություն է հայտնել «Ատլետիկոյին» անցկացրած 700-րդ հանդիպումից հետո, ինչպես նաև հայտարարել է, որ մտադիր է մնալ իր պաշտոնում։
«Շնորհակալ եմ «Ատլետիկոյին» այս 700 խաղերի համար։ Եվ ինչպես ասել եմ տարիներ առաջ, այս ակումբն ապագա ունի։ Այսպիսով… Եկեք միասին հասնենք ավելիին: Միշտ շնորհակալ եմ:
Մարդիկ ինձ միշտ հարցնում են, թե արդյոք ես մնալու եմ: Այո, ես պատրաստվում եմ մնալ: Իսկ գիտե՞ս ինչու եմ մնալու։ Քանի որ այս ակումբն ապագա ունի, իսկ ապագան մենք բոլորս ենք»,- Սիմեոնեի խոսքերն է մեջբերում Marca-ն։
54-ամյա Սիմեոնեն դարձավ Լա Լիգայի պատմության մեջ առաջին մարզիչը, ով 700 պաշտոնական հանդիպում է անցկացրել թիմի ղեկին։
Մադրիդի «Ատլետիկոյի» գլխավոր մարզչի պաշտոնում Սիմեոնեի 700 հանդիպումներում նա հաղթել է 413 անգամ, 156 անգամ ոչ-ոքի է խաղացել և 131 պարտություն կրել։
