Հայաստանի ֆուտբոլի ֆեդերացիայի փոխնախագահ Արմեն Նիկողոսյանը խոսել է ազգային հավաքականի նոր մարզիչ փնտրելու մասին։
«Ոչ մի մարզիչ չի կարող երաշխավորել, որ կկարողանա թիմին հասցնել աշխարհի առաջնություն: Նույնիսկ այնպիսի փորձագետներ, ինչպիսիք են Անչելոտտին և Գվարդիոլան:
Մենք Հյուսիսային Մակեդոնիայի հետ խաղից հետո հանդերձարանում հրաժեշտ տվեցինք Ալեքսանդր Պետրակովին և շնորհակալություն հայտնեցինք կատարած աշխատանքի համար։ Մի քանի օր մնաց Երևանում, վարձով բնակարանը հանձնեց ու հեռացավ։ Պետրակովը ևս անձնական խնդիրներ ուներ և ստիպված էր շտապ հեռանալ։ Նրա մարզչական շտաբի անդամները մնացել են և աշխատում են այսօր։
Նոր գլխավոր մարզչի նշանակման շուրջ բանակցություններն ամեն օր շարունակվում են։ Բանակցությունները շատ ծանր են ընթանում: Ֆեդերացիայի նախագահ Արմեն Մելիքբեկյանի հետ հանդիպել ենք Միշել Տեր-Զաքարյանի հետ, բայց նա ֆինանսական մեծ կարիքներ ունի։ Քննարկեցինք նաև Մարգար Աղաջանյանի տարբերակը: Նրա հետ էլ ենք հանդիպումներ ունեցել։
Թեկնածուների թվում կան բազմաթիվ մասնագետներ, այդ թվում՝ Ռաուլը։ «Նոայի» գլխավոր մարզիչ Ռուի Մոտայի հետ բանակցությունների մասին լուրերը սուտ են»,- Նիկողոսյանի խոսքերն է մեջբերում Fast news-ը։
Նախկինում թիմը գլխավորում էր Ալեքսանդր Պետրակովը, ով պաշտոնանկ էր արվել հոկտեմբերի կեսերին։
