«Մանչեսթեր Սիթիի» գլխավոր մարզիչ Պեպ Գվարդիոլան հաստատել է, որ թիմի իսպանացի կիսապաշտպան Ռոդրին բաց կթողնի մրցաշրջանի մնացած հատվածը։
Կիրակի օրը՝ սեպտեմբերի 22-ին, 28-ամյա ֆուտբոլիստը վաղաժամ լքեց խաղադաշտը՝ «Արսենալի» հետ Անգլիայի առաջնության 5-րդ տուրի խաղում (2։2)։ Բժշկական անձնակազմը Ռոդրիի մոտ խաչաձև կապանների վնասվածք է ախտորոշել։
«Նա պատրաստ կլինի հաջորդ մրցաշրջանում։ Ռոդրիի համար ընթացիկ մրցաշրջանը ավարտված է»,- Գվարդիոլայի խոսքերն է մեջբերում Sky Sports-ը։
Ռոդրին «Մանչեսթեր Սիթիում» հանդես է գալիս 2019 թվականի հուլիսից։ 2023/24 մրցաշրջանի վերջում կիսապաշտպանը դարձավ «Ոսկե գնդակի» 30 հավակնորդներից մեկը։
