ՈւԵՖԱ-ի նախագահ Ալեքսանդր Չեֆերինը կիսվել է հունիսի 14-ին մեկնարկող Եվրոպայի առաջնության հետ կապված իր ակնկալիքներով։
«Վերջապես եկել է ՈՒԵՖԱ Եվրո-2024-ի ժամանակը, և անհնար է չզգալ այն ոգևորությունն, որը շրջապատում է այս ֆուտբոլային փառատոնը։
Առաջին մրցաշարի մեկնարկից ի վեր՝ 1960 թվականին, Եվրոպայի առաջնությունը վերածվել է աշխարհի ամենահետաքրքիր մարզական իրադարձություններից մեկի։ Այս ամառային մրցաշարը ոչ պակաս էպիկական կլինի, որտեղ 24 թիմեր պատրաստ են պայքարել պատմության մեջ տեղի համար և կանեն ամեն ինչ Անրի Դելոնեի բաղձալի գավաթը նվաճելու համար։
Եվրո-2024-ի նկատմամբ հետաքրքրությունը աներևակայելի մեծ էր ամբողջ աշխարհում դեռևս դրա սկսվելուց առաջ։ Անցյալ տարի ավելի քան 50 միլիոն հայտ է ներկայացվել տոմսերի վաճառքի երկու պատուհանների ընթացքում, և մենք ստացել ենք ռեկորդային 146,000 կամավոր հայտ՝ ցույց տալով այս իսկապես համաշխարհային իրադարձության նկատմամբ հսկայական հետաքրքրությունը։
Գերմանիան հայտնի է իր հարուստ ֆուտբոլային ավանդույթներով և հպարտանում է անհավանական ենթակառուցվածքով: Հաճելի փորձը խաղացողների, պաշտոնյաների և երկրպագուների համար Գերմանիային կդարձնի ՈՒԵՖԱ Եվրո-2024-ի իդեալական հյուրընկալողը։
Մեր ամառային մրցաշարը վերաբերում է ոչ միայն խաղադաշտում գործող հերոսների վարպետությանը և քաջությանը, այլև կյանքին, ներառմանը և բազմազանությանը:
ՈՒԵՖԱ-ն, Գերմանիայի ֆուտբոլային ասոցիացիան (FSG), դաշնային և տեղական իշխանությունները միավորվել են՝ անցկացնելու մեծ միջոցառում՝ նվիրված ժողովրդավարությանը, հարգանքին, հանդուրժողականությանը և մարդու իրավունքներին: Մենք նշանակալի քայլեր ենք ձեռնարկել մրցաշարի շրջակա միջավայրի վրա ազդեցությունը նվազագույնի հասցնելու համար և ստեղծել ենք Grassroots Football Climate Fund-ը, որը խոստանում է մնայուն ժառանգություն թողնել:
Ես ուզում եմ շնորհակալություն հայտնել բոլոր ներգրավվածներին՝ սկսած մեր հովանավորներից և գործընկերներից մինչև մեր մատակարարները, ձեր անհավատալի աջակցության և մեր առաքելությանը անսասան նվիրվածության համար:
Հիմա եկեք վայելենք այս կախարդական ֆուտբոլային ամառը արդար խաղի և հարգանքի ոգով և միասին ստեղծենք անմոռանալի հիշողություններ: Եվ թող ֆուտբոլը միավորի մեզ բոլորիս»,- Չեֆերինի խոսքերն է մեջբերում ՈւԵՖԱ-ի մամուլի ծառայությունը։
Եվրոպայի առաջնությունը կմեկնարկի հունիսի 14-ին Գերմանիա – Շոտլանդիա խաղով։ Սկիզբը՝ Երևանի ժամանակով 23։00-ին։
