«Ռոմայի» և Արգենտինայի հավաքականի հարձակվող Պաուլո Դիբալան առաջիկա ամառային տրանսֆերային պատուհանի ընթացքում կարող է տեղափոխվել «Բարսելոնա», հայտնում է Sport.es-ը։

Ըստ աղբյուրի՝ հարձակվողի ներկայացուցիչներն իսպանական ակումբի ղեկավարությանը առաջարկել են իրենց հաճախորդի ծառայությունները։ 30-ամյա ֆուտբոլիստի ներկայիս պայմանագիրը «Ռոմայի» հետ ներառում է կետ փոխհատուցման չափի մասին, որը կազմում է 12 միլիոն եվրո:

Նշվում է, որ «Բլաուգրանայի» ղեկավարությունը հետաքրքրված է այս տարբերակով և արգենտինացու գործակալներին խոստացել է աշխատել հնարավոր գործարքի վրա: Փոխհատուցման ցածր գումարը կարող է շատ ավելի հեշտացնել «Բարսելոնային» նման տրանսֆերի իրականացումը։

Դիբալան «Ռոմայում» հանդես է գալիս 2022 թվականից։ Այս մրցաշրջանում հարձակվողը հռոմեացիների կազմում անցկացրել է 25 հանդիպում բոլոր մրցաշարերում, որոնցում դարձել է 13 գոլի և 6 գոլային փոխանցման հեղինակ։ Ֆուտբոլիստի պայմանագիրը ներկայիս ակումբի հետ ուժի մեջ է մինչև 2025 թվականի հունիսի վերջը։

Ֆուտբոլիստի գնահատված արժեքը, Transfermarkt ինտերնետային պորտալի տվյալներով, կազմում է 25 մլն եվրո։