«Չելսին» հունվարին իր հնարավոր տրանսֆերների ցուցակում ավելացրել է «Նապոլիի» 24-ամյա հարձակվող Վիկտոր Օսիմհենին, հայտնում են ESPN-ի աղբյուրները։ Ակումբը կենտրոնական հարձակվող է փնտրում և հետևում է նաև «Բրենտֆորդի» 27-ամյա խաղացող Իվան Թոնիին: Երկու ֆուտբոլիստներն էլ հետաքրքրում են «Արսենալին»:
Այս փուլում պարզ չէ, թե արդյոք լոնդոնյան ակումբները հունվարին պաշտոնական առաջարկ կներկայացնեն Օսիմհենի համար: Շատ բան կարող է կախված լինել նրանից, թե ինչպես կընթանան Թոնիի հետ կապված բանակցությունները:
«Նապոլին» հույս ունի Օսիմհենին թիմում պահել առնվազն մինչև հաջորդ ամառ: Նեապոլցիների բանակցությունները 24-ամյա հարձակվողի հետ դանդաղել են հրաժարագնի կետի պատճառով, որը ֆուտբոլիստը ցանկանում է ներառել պայմանագրում, ինչպես նաև ակումբի սոցցանցերում հրապարակման հետ կապված սկանդալի պատճառով։ Այնտեղ տեսանյութ է հրապարակվել, որտեղ հարձակվողին ծաղրում են 11 մետրանոցը չիրացնելու համար, որն ավելի ուշ ջնջվել է։
