Մադրիդի «Ռեալը», ամենայն հավանականությամբ, կձգտի ձեռք բերել ՊՍԺ-ի 24-ամյա հարձակվող Կիլիան Մբապպեին հաջորդ ամառ, ոչ թե այս, հայտնում է Football Espana-ն:
Աղբյուրի համաձայն՝ «սերուցքայինների» ղեկավարության դիրքորոշումը չի փոխվել՝ նրանք նույնպես նախատեսում են սպասել հաջորդ ամառ՝ ազատ գործակալի կարգավիճակով Ֆրանսիայի հավաքականի հարձակվողին գնելու համար։ Չնայած այն վերջնագրին, որը փարիզյան ակումբը ներկայացրել է Մբապպեին, Մադրիդի «Ռեալը» հանգիստ է վերաբերվում ֆուտբոլիստի շուրջ ստեղծված իրավիճակին։
Իր հերթին ՊՍԺ-ն կփորձի համոզել Կիլիանին նոր պայմանագիր կնքել։ Ձախողման դեպքում փարիզցիները կսկսեն քննարկել ֆուտբոլիստի գինը և ծրագրում են ակտիվորեն վաճառել նրան օգոստոսին։ «Ռեալը» պատրաստ կլինի ներխուժել և գնել ֆրանսիացուն այս ամառ, եթե գինը իրենց հարմար լինի:
Կիլիան Մբապպեն ՊՍԺ-ի ֆուտբոլիստ է դարձել 2017 թվականի ամռանը՝ տեղափոխվելով «Մոնակոյից»։ Նախորդ մրցաշրջանում հարձակվողը 43 խաղում դարձել է 41 գոլի և 10 գոլային փոխանցման հեղինակ։ ՊՍԺ-ի հետ Մբապպեն հինգ անգամ հաղթել է Ֆրանսիայի առաջնությունը, երեք անգամ՝ Ֆրանսիայի գավաթը։
