Պետք է հեռանալ, բայց ո՞ւր․․․

Նոր օր՝ նոր խոսակցություն Էդուարդ Սպերցյանի՝ Եվրոպա հնարավոր հեռանալու մասին.

De Telegraaf-ը գրում է, որ «Այաքսը» պաշտոնական առաջարկ է արել «Կրասնոդարին»։ Տրանսֆերը կազմում է 9 միլիոն եվրո։ Ճիշտ է, SE-ի խնդրանքին «Այաքսի» մամուլի ծառայությունը 23-ամյա հայ ֆուտբոլիստի հնարավոր տեղափոխության վերաբերյալ պատասխանել է շատռ պարզ, բայց զգացվում է, որ նրանք գլխավոր ֆավորիտն են այս պայքարում. «Մենք չենք արձագանքի նման լուրերին: Հետագա տրանսֆերների մասին կտեղեկացվի համապատասխան մամուլի հաղորդագրություններում»։

Այդուհանդերձ, Սպերցյանի հեռանալու մասին նույն խոսակցությունները վերջին շրջանում շատ կանոնավոր են հայտնվում։ Ձմռանը Էդուարդին համառորեն տեղափոխում էին ՊՍՎ (նույնիսկ գրում էին «Ռեալի» հետաքրքրության մասին), հիմա գրում են «Մարսելի», «Ֆիորենտինայի» և Գլադբախի «Բորուսիայի» տարբերակների մասին, անգամ Մանչեսթեր «Սիթիի»։ Ինքը՝ ֆուտբոլիստը, չի թաքցնում, որ երազում է Եվրոպայում խաղալու մասին, և թեև շղարշով ու լղոզված է խոսում իր ապագայի մասին, ակնհայտ է, որ չի պատրաստվում մինչև կարիերայի ավարտը մնալ ՌՊԼ-ում։

Մենք գիտենք, թե որքան եզակի է Սպերցյանը ՌՊԼ-ի համար։ Մի խոսքով, նա երիտասարդ և ստեղծագործ ֆուտբոլիստ է՝ տեխնիկայի մեծ զինանոցով (օրինակ՝ հեռահար հարվածներ կամ տուգանային հարվածներ), դինամիկ, աշխատասեր, արդյունավետ և միևնույն ժամանակ անընդհատ առաջադիմող։

Յուրի Սեմինը SE-ին տված հարցազրույցում ասել է. «Սպերցյանն, անկասկած, տաղանդավոր տղա է, նա պետք է զարգանա։ Նրանց բոլորի համար օրինակ է Հենրիխ Մխիթարյանը, ով 34 տարեկան է և խաղում է «Ինտերում»։ Որովհետև նա ճիշտ է մարզվում, պահպանում է ռեժիմը։ Ինքը՝ Էդուարդը, ասել է, որ Մխիթարյանն իր համար կուռք է։ Ուստի զարմանալի չէ, որ հայ պատանիները ուզում են նմանվել Հենրիխին։ Այո, հավաքականում Մխիթարյանի հեռանալուց հետո Սպերցյանը գլխավոր աստղն ու հույսն է։ Ավելին, խաղային բնութագրերի առումով դրանք շատ նման են։ Ակնկալիքները տեղին են»։

Արդյո՞ք Սպերցյանը մյուսներից ավելի է արժանի եվրոպական լուրջ առաջնություն մեկնելուն։ Հարցը վիճելի է՝ հաշվի առնելով, որ քաղաքական ենթատեքստն ազդում է ռուսական ակումբների նկատմամբ տրանսֆերային քաղաքականության վրա։ Հատկանշական է, որ Էդուարդի՝ Եվրոպա մեկնելու մասին լուրերը սկսեցին հայտնվել այն բանից հետո, երբ նա հայտարարեց, որ հանդես է գալու Հայաստանի հավաքականում։ Կարպինը այնուհետև ասաց. «Լավ խաղացող է, բայց նման բան չկա, մենք նրա հետ չենք հաղթի աշխարհի առաջնությունը»: Իհարկե, Սպերցյանը միայնակ չի հաղթի աշխարհի առաջնությունը, բայց, այնուամենայնիվ, Էդուարդը ՌՊԼ-ի մրցաշրջանի լավագույն ասիստենտն է (12 փոխանցում), իսկ գոլ + փոխանցումով զիջեց միայն Մալկոմին, Պրոմեսին և Չալովին։ Եվ դա չնայած այն բանին, որ լեգեոներների հեռանալուց հետո «Կրասնոդարի» կազմի որակը շատ անկում ապրեց, և այժմ այն ​​այլ մակարդակի թիմ է, քան մեկուկես տարի առաջ։

Սպերցյանը կարծես թե գտնվում է ՌՊԼ-ի աստղերի ստվերում։ Նրանք պարզապես ավելի քիչ են խոսում «Կրասնոդարի» մասին, քան «Զենիթի» կամ մայրաքաղաքային ակումբների մասին: Բայց նրա խաղի վիճակագրությունը և գնահատականները (օրինակ, Պրոմեսը «SE»-ի քվեարկության ժամանակ նրան անվանել է մրցաշրջանի լավագույն խաղացող) ցույց է տալիս, որ նա արդեն առաջնության ամենաուժեղ խաղացողներից մեկն է, նույնիսկ եթե նա չի քննարկվում հաճախ, ինպչես Պրոմեսը, Զախարյանը կամ Ձյուբան: Ամեն դեպքում, եվրոպացի գնորդի համար հիմա շատ դժվար է Ռուսաստանում գտնել ավելի հաջող ու ապահով տրանսֆեր, հատկապես երբ Սպերցյանը հիանալի է հանդես գալիս ազգային հավաքականում։

Որքանո՞վ է իրատեսական «Այաքսի» հետ կապված տարբերակը: Անկեղծ ասած, թվում է, թե դրանից ոչինչ չի ստացվի: Այո՛, ամստերդամցիները խաղում են նույն 4-3-3 սխեմայով, ինչ «Կրասնոդարը», և Սպերցյանը երկար ժամանակ ստիպված չի լինի հարմարվել տակտիկական մանրամասներին։ Բայց մյուս կողմից, նույն դիրքում հզոր մրցաշրջան անցկացրեց վետերան Դեյվի Կլասենը։ Գումարած, «Այաքսը» վերջերս պայմանագիր է կնքել Թուլուզից Բրանկո վան դեն Բումենի հետ, որը նույնպես կիսապաշտպան է և նաև ձախլիկ, որը լավ ծանոթ է 4-3-3 սխեմային: Թե ինչու է նման սցենարի դեպքում Ամստերդամի գրանդին նույնպես պետք է Սպերցյանը, առեղծված է։

Վերջին շրջանում հաճախ էր քննարկվում նաև Մյոնխենգլադբախի «Բորուսիա» տեղափախությունը։ Իհարկե, այս տրանսֆերը հայ երկրպագուի սիրտը կջերմացնի, քանի որ այնտեղ է տեղափոխվել նաև հավաքականի նորեկ Հրանտ-Լեոն Ռանոսը։ Նրանց համատեղ խաղերը ապացույցն են նրա, որ կարող են մեկ թիմում հիանալի զույգ կազմել ու վախեցնել մյուս ակումբներին։ Այս տարբերակը շատ ավելի հարմար տարբերակ է այն առումով, որ Սպերցյանը կարողանում է շատ լավ հանդես գալ 4-2-3-1 սխեմայում, իսկ գերմանական ակումբում ենթահարձակվողի պարտականությունները կատարում են 26-ամյա գերմանացի Ֆլորիան Նոյահաուսը, ով Բունդեսլիգայի այս մրցաշրջանի 23 խաղում 1 գոլի հեղինակ է դարձել, և Քրիստոֆ Կրամերը, ով արդեն բավականին մեծ է՝ 32 տարեկան։ Այս պարագայում տեղափոխությունը ու կազմում տեղ գտնելը շատ ավելի հավանական է։

Բացի դա՝ մարզիչը Դենիել Ֆարկեն է, ով, ճիշտ է, քիչ ժամանակ է մարզել «Կրասնոդարը» (2022 թվականի հունվարի 13-ից մինչև մարտի 2-ը), բայց ծանոթ է 23-ամյա հայ կիսապաշտպանի խաղին։ Նրա գործոնը կարող է շատ մեծ ու կարևոր մոտիվ կարող է լինել տեղափոխության իրականացման համար։

Այդուհանդերձ, Էդուարդին պետք է հեռանալ՝  նոր մակարդակի հասնելու համա-ր, եթե այդպիսի հնարավորություն կա։ Այստեղ կարևոր է ևս մեկ բան՝ ոչ թե պարզապես հեռանալը, այլ ճիշտ թիմ ընտրելը, որտեղ նա կունենա խաղաժամանակ, ոճային համատեղելիություն և, որ ամենակարևորը, ավելի առաջադիմելու հնարավորություն կունենա։ Միանշանակ, Սպերցյանը հետխորհրդային տարածքում իր սերնդի ամենատաղանդավոր ներկայացուցիչներից է։ Բայց արդյոք հնարավոր կլինի իրականացնել երազանքը և գոնե փորձել մոտենալ Մխիթարյանի մակարդակին, կախված է նրա հաջորդ ընտրությունից։