«Ռեալ Մադրիդի» հարձակվող Կիլիան Մբապպեն կիսվել է ՊՍԺ-ում Լիոնել Մեսսիի հետ խաղալու իր հիշողություններով, ով այժմ խաղում է «Ինտեր Մայամիում»։
«Երբ խոսում ես պատմություն կերտած ֆուտբոլիստների մասին, մտածում ես Մեսսիի մասին։ Հանդերձարանում նա բոլորովին սովորական մարդ է։ Երբ հայտնի ես, շատերը քեզ պիտակավորում են, և եթե լսում ես նրանց, հավատում ես դրան, բայց ոչ, նա բոլորովին սովորական մարդ էր և հարգում էր բոլորին։
Որպես ֆուտբոլիստ՝ նա յուրահատուկ էր։ Երբ թիմում ունես նման մեկին, պետք է նրա կողքին լինես և դիտես նրա արած ամեն ինչ։ Նա իսկապես օգնեց ինձ հասկանալ խաղը։
Ես բախտ ունեցա խաղալ Լեո Մեսսիի հետ։ Ես երբեք չէի մտածի, որ կխաղամ նրա հետ իմ կարիերայի որևէ փուլում։ Ես կարծում էի, որ նա կմնա «Բարսելոնայում» իր կյանքի մնացած մասը, և իմ երազանքը «Ռեալ Մադրիդն» էր։
Ես երբեք չէի մտածել «Բարսելոնա» տեղափոխվելու մասին։ Ես կարող եմ միայն շնորհակալություն հայտնել նրան։ Դա հիանալի հնարավորություն էր», – ասել է Մբապպեն Movistar-ին տված հարցազրույցում։
