«Նախ՝ շատ եմ կարևորում, որ Պորտուգալիայի հավաքականի հետ խաղից առաջ մարզչական փոփոխություն տեղի ունեցավ մեր հավաքականում, որովհետև իմ տպավորությամբ Ջոն վանտ Սխիպը ուղղակի «մոլորված» մարզիչ էր և չէր կարողանալու ինչ-որ համակարգային բան ստանալ այս ընթացքում, նույնիսկ պարզ խաղակցվածություն: Եղիշե Մելիքյանի ընտրությունը տեղին էր՝ նախևառաջ մարտական ոգու բարձրացման առումով, որովհետև նա «Փյունիկում» ցույց է տվել, որ այդ գործոնը մշտապես առաջնային է, ու ինքը մշտապես կարողանում է դա ապահովել: Բացի այդ, նա ապացուցել է, որ նաև տակտիկապես է շատ գրագետ ու ճկուն, ուստի՝ առնվազն սպասում եմ մարտական պայքար, եթե չասեմ՝ հավասար պայքար:

Իհարկե, Պորտուգալիան այս պահին չափազանց ուժեղ հավաքական է, բայց կարծում եմ Ռոնալդուի գործոնը գերագնահատված է: Անզեն աչքով էլ երևում է, որ նա նախկին գործառույթներն ու ուժը չունի հավաքականում, և նրան վնասազերծելը ավելի հեշտ է: Լավ կլինի, որ մեր ֆուտբոլիստները չկենտրոնանան հենց Ռոնալդուի վրա, որովհետև Պորտուգալիայի հավաքականում ավելի ուժեղ ու վտանգավոր ֆուտբոլիստներ կան:

Ընդհանրապես, մեր հավաքականը Պորտուգալիայի հետ, հատկապես տանը՝ թույլ խաղեր չի անցկացրել: Երկու անգամ ոչ-ոքի (0:0, 1։1), և մեկ պարտություն՝ 2։3 հաշվով: Կարծում եմ, որ այս անգամ էլ ոչ֊ոքի կխաղանք, և էլի 1:1 հաշիվ կգրանցվի։

Հաշվի առնելով, որ տանը մեր հավաքականից Պորտուգալիային խփած 3 գոլերից երկուսը խփել են  կենտրոնական պաշտպաններ (Ռոբերտ Արզումանյան, Հրայր Մկոյան), կարծում եմ՝ այս անգամ էլ գոլ կխփի մեր կենտրոնական պաշտպաններից մեկը», – ասել է Արքմենիկ Նիկողոսյանը։

Հիշեցնենք, որ հանդիպումը կկայանա Վազգեն Սարգսյանի անվան հանրապետական մարզադաշտում և կմեկնարկի Երևանի ժամանակով 20:00-ին։