«Մանչեսթեր Յունայթեդի» կիսապաշտպան Ջեյդոն Սանչոյի և «Ռոմայի» ղեկավարության միջև բանակցություններ են ընթանում հնարավոր տրանսֆերի վերաբերյալ։ Այս մասին հաղորդում են Football-Italia-ի լրագրողները։
«Կարմիր սատանաները» արդեն համաձայնության են եկել 23 միլիոն եվրոյի տրանսֆերի շուրջ, սակայն հռոմեացիները դեռևս չեն կարողացել համաձայնության գալ ֆուտբոլիստի հետ համագործակցության պայմանների շուրջ։
Վինգերը գոհ չէ «գայլերի» առաջարկած աշխատավարձից։ Ջեյդոնը ցանկանում է իր համար ավելի բարենպաստ պայմաններ ապահովել։ Սանչոյի ներկայիս աշխատավարձը տարեկան մոտ 15 միլիոն եվրո է։
Իտալական ակումբը չի կարող իրեն թույլ տալ նման ծախսեր։ Անցյալ մրցաշրջանում 25-ամյա անգլիացին վարձավճարով խաղացել է Լոնդոնի «Չելսիի» կազմում։ Նա Պրեմիեր լիգայում անցկացրել է 31 խաղ, խփել է երեք գոլ և կատարել չորս գոլային փոխանցում։
