«Բարսելոնան» իրականացրել է «Էսպայ Բարսա» հավակնոտ նախագծի հետ կապված պարտքի մի մասի լայնածավալ վերաֆինանսավորում։
Ինչպես հաղորդվում է կատալոնական ակումբի պաշտոնական կայքում, թողարկվել են 424 միլիոն եվրոյի պարտատոմսեր՝ պարտքի ավելի քան 40 տոկոսը վերակառուցելու համար, որը նախկինում պետք է մարվեր 2028 թվականին։
Այժմ վճարման ժամանակացույցը զգալիորեն փոխվել է։ Ակումբը կսկսի մարել իր պարտավորությունները միայն 2033 թվականին, իսկ վերջնական վճարումը պետք է կատարվի 2050 թվականին։ Նոր պարտքի կառուցվածքի միջին տոկոսադրույքը կազմել է 5․19 տոկոս։ Ֆինանսական գործարքը իրականացվել է ներդրումային հսկա «Գոլդման Սաքսի» աջակցությամբ։
«Բարսելոնան» ընդգծում է, որ նոր մոդելը թույլ է տալիս ակումբին չշեղել առկա ռեսուրսները և սկսել վճարումները «Կամպ Նոուի» վերակառուցման ավարտից հետո՝ օգտագործելով թարմացված մարզադաշտի և դրան կից ենթակառուցվածքների կողմից ստեղծվող եկամուտը։ Կանխատեսումների համաձայն՝ խոսքը տարեկան 247 միլիոն եվրոյի մասին է։
«Էսպայ Բարսա» նախագիծը ներառում է «Կամպ Նոուի» ամբողջական վերակառուցում, նոր օբյեկտների կառուցում և մարզադաշտի շրջակայքի լայնածավալ արդիականացում։
