Հայաստանի ազգային հավաքականի կիսապաշտպան Էդուարդ Սպերցյանը կարող է փոխել ակումբային գրանցումը առաջիկա տրանսֆերային պատուհանի ընթացքում։ Ռուսական մամուլը հայտնում է, որ նիդերլանդական ֆուտբոլի գրանդներից մեկը՝ Ամստերդամի «Այաքսը», հետաքրքրված է 25-ամյա ֆուտբոլիստի ծառայություններով և դիտարկում է նրա հնարավոր տրանսֆերը 2025 թվականի ամռանը։
Սպերցյանի անունը վերջին շրջանում կապվում է նաև մի քանի այլ եվրոպական ակումբների հետ։ Մասնավորապես, նրան հետևում են նաև անգլիական «Լիդս Յունայթեդը» և իսպանական «Սևիլիան»։ Ինքը՝ Սպերցյանը, ավելի վաղ ընդգծել է իր ցանկությունը՝ շարունակելու կարիերան եվրոպական բարձրակարգ առաջնություններից մեկում։
2024/2025 մրցաշրջանը «Կրասնոդարի» համար հաջող է ստացվել, և Սպերցյանը այդ հաջողության առանցքային մասն է կազմել։ Նա մասնակցել է 28 խաղի, խփել 11 գոլ և կատարել 7 գոլային փոխանցում՝ օգնելով թիմին նվաճել Ռուսաստանի առաջնության ոսկե մեդալները։
