Սաուդյան Արաբիայի Պետական ներդրումների հիմնադրամի (PIF) ներկայացուցիչները կապ են հաստատել Ֆրանսիայի ազգային հավաքականի գլխավոր մարզիչ Դիդյե Դեշամի շրջապատի հետ՝ քննարկելու նրա հնարավոր տեղափոխությունը 2026 թվականի աշխարհի առաջնությունից հետո։ Այս մասին հաղորդում է ինսայդեր Սաշա Տավոլիերին։

Դեշամը գլխավորում է Ֆրանսիայի հավաքականը 2012 թվականից։ Նրա ղեկավարությամբ թիմը նվաճել է աշխարհի գավաթը 2018-ին և դուրս եկել եզրափակիչ 2022-ին։ Նրա գործող պայմանագիրը ավարտվում է 2026 թվականի աշխարհի առաջնությունից հետո, իսկ ինչպես նա փետրվարին հայտնել է, պայմանագրի երկարաձգում չի նախատեսում՝ ծրագրելով հեռանալ հավաքականից 14 տարվա աշխատանքից հետո։

Մարզչին մոտ կանգնած աղբյուրները նշել են, որ Սաուդյան Արաբիայից ցուցաբերված հետաքրքրությունը գնահատելի է, սակայն այս պահին լուրջ բանակցությունների համար դեռ վաղ է։