«Արարատ-Արմենիա» ֆուտբոլային ակումբը հայտնել է, որ գլխավոր մարզիչ Վարդան Մինասյանը և նրա մարզչական շտաբը՝ Արտակ Օսեյանը, Արթուր Մկրտչյանը և Դենիս Զմեուն, ավարտել են աշխատանքը թիմում։
Մինասյանի օրոք ակումբը հասել է մի շարք կարևոր նվաճումների՝ երկու անգամ նվաճելով Հայաստանի առաջնության ոսկե մեդալներ, երկու անգամ հաղթելով Սուպերգավաթում, ինչպես նաև արժանանալով Հայաստանի գավաթին։ Ակումբը շեշտել է, որ մարզչական շտաբի ներդրումը միայն հաջողություններով չի չափվում․ նրանք մնացել են որպես ակումբի պատմության առանցքային մասնիկ։
«Արարատ-Արմենիան» իր երախտագիտությունն է հայտնել մարզիչներին՝ նրանց մասնագիտացված աշխատանքի, նվիրվածության և թիմի նկատմամբ հոգատար վերաբերմունքի համար՝ ցանկանալով հաջողություններ նրանց հետագա մարզչական կարիերայում։
Հավելենք, որ Մինասյանը մինչ այս պաշտոնն արդեն հայտնի էր որպես Հայաստանի ազգային հավաքականի նախկին գլխավոր մարզիչ։
