Ռուսաստանի Պրեմիեր լիգայի 30-րդ տուրում «Կրասնոդարը» վստահ հաղթանակով նվաճեց իր առաջին չեմպիոնական տիտղոսը՝ սեփական հարկի տակ 3-0 հաշվով առավելության հասնելով Մոսկվայի «Դինամոյի» նկատմամբ։
Հաղթական հանդիպման առաջին գոլը հեղինակեց կոլումբիացի հարձակվող Ջոն Կորդոբան՝ իր ճշգրիտ հարվածով եզրափակելով Հայաստանի հավաքականի կիսապաշտպան Էդուարդ Սպերցյանի փոխանցումը։ Սպերցյանը նաև կատարեց երկրորդ գոլային փոխանցումը՝ այս անգամ Նիկիտա Կրիվցովին, ով կրկնապատկեց «Կրասնոդարի» առավելությունը։ Վերջնական արդյունքը ձևակերպեց հենց Սպերցյանը՝ դառնալով խաղի երրորդ գոլի հեղինակ։
Այս հաղթանակի շնորհիվ «Կրասնոդարը» վաստակեց բավարար միավորներ՝ մրցաշարային աղյուսակում առաջին տեղը զբաղեցնելու և պատմական չեմպիոնության հասնելու համար։
