Լա Լիգայի նախագահ Խավիեր Տեբասը դժգոհություն է հայտնել Բարձրագույն սպորտային խորհրդի (CSD) որոշման կապակցությամբ, որը բավարարել է «Բարսելոնայի» ֆուտբոլիստներ Դանի Օլմոյի և Պաու Վիկտորի, ինչպես նաև հենց կատալոնական ակումբի բողոքները։
Նրանք նախկինում բողոքներ էին ներկայացրել Լա Լիգայի և Իսպանիայի ֆուտբոլի թագավորական ֆեդերացիայի (RFEF) դեմ՝ հրաժարվելով գրանցել ֆուտբոլիստներին մրցաշրջանի մնացած հատվածի համար։
X սոցիալական ցանցում (նախկինում՝ Twitter) իր հրապարակման մեջ Տեբասը մանրամասն բացատրել է CSD-ի որոշման անօրինականությունը իրավական տեսանկյունից։
«Մենք կշարունակենք պաշտպանել մեր իրավասությունները և մեր գործընթացները ոչ թե ինստիտուցիոնալ հպարտությունից ելնելով, այլ պրոֆեսիոնալ իսպանական սպորտի հանդեպ պատասխանատվությունից ելնելով», – գրել է Տեբասը։
