«Ալ-Նասրի» հարձակվող Կրիշտիանու Ռոնալդուն կարող է վերադառնալ Մադրիդի «Ռեալ»։ Այս մասին հայտնում է Sky Sports-ը։
Ինչպես արդեն տեղեկացրել էինք, 40-ամյա պորտուգալացին դիտարկում է «Ալ-Նասրի» հետ պայմանագիրը չերկարաձգելու հնարավորությունը, որն ավարտվում է այս մրցաշրջանի ավարտին։ Ռոնալդուն ցանկանում է մասնակցել 2025 թվականի Աշխարհի ակումբային նոր առաջնությանը, որին Սաուդյան Արաբիայի ակումբը չկարողացավ որակավորվել։
ՖԻՖԱ-ն Աշխարհի ակումբային առաջնության ժամանակ հունիսի 1-ից 10-ը կբացի հատուկ տրանսֆերային պատուհաններ, իսկ Ռոնալդուն հնարավորություն կունենա մեկ մրցաշարի պայմանագիր կնքել թիմի հետ։
Ավելի վաղ հաղորդվում էր, որ հարձակվողով հետաքրքրված են նաև «Ինտեր Մայամին» և «Ալ-Հիլալը»։
Ընթացիկ մրցաշրջանում Ռոնալդուն ակումբի և ազգային հավաքականի կազմում անցկացրած 40 խաղում դարձել է 34 գոլի և 5 գոլային փոխանցման հեղինակ։