«Բարսելոնան» պատրաստվում է երկարաձգել պայմանագիրը թիմի վինգեր Անսու Ֆատիի հետ։
Ինչպես հայտնում է Sport.es-ը, կատալոնական ակումբը հույսը չի դնում ֆուտբոլիստի վրա, սակայն պատրաստ է նրան նոր պայմանագիր առաջարկել հինգ տարի ժամկետով։ Դա նախատեսվում է անել ֆինանսական ֆեյր-փլեյի պահանջներին համապատասխանելու նպատակով։
Ըստ աղբյուրի՝ մինչև 2027 թվականի ամառ գործող պայմանագրով նախատեսված ֆուտբոլիստի աշխատավարձը կբաշխվի հինգ օրացուցային տարվա ընթացքում։ Այս սխեման կիրառվել է 2022 թվականին ֆրանսիացի պաշտպան Սամուել Ումտիտիի հետ պայմանագիրը երկարաձգելիս։
Հիշեցնենք, որ 13 միլիոն եվրո աշխատավարձով Ֆատին Բարսելոնայի երրորդ ամենաբարձր վարձատրվող ֆուտբոլիստն է՝ հարձակվող Ռոբերտ Լևանդովսկուց և կիսապաշտպան Ֆրենկի դե Յոնգից հետո։ Նոր պայմանագրով Ֆատիի 26 միլիոն եվրոն կվճարվի մինչև 2030 թվականը (տարեկան 5,2 միլիոն եվրո)։
Ֆուտբոլիստին կառաջարկեն նաև որոշակի քանակությամբ բոնուսներ, որպեսզի նա համաձայնի այս քայլին։ Նման գործողությունը թույլ կտա «Բարսելոնային» գրանցել նոր ֆուտբոլիստներ, որոնք ձեռք կբերվեն ամառային տրանսֆերային պատուհանի ընթացքում։
