«Բարսելոնան» շարունակում է բանակցությունները 17-ամյա վինգեր Լամին Յամալի հետ պայմանագիրը երկարաձգելու շուրջ։ Կողմերը պետք է քննարկեն հաջորդ մրցաշրջանների համար ֆուտբոլիստի աշխատավարձի կառուցվածքը։ Այս մասին հայտնում է AS-ը։
Աղբյուրի փոխանցմամբ՝ կատալոնական ակումբի ղեկավարությունը ցանկանում են Յամալին պայմանագիր առաջարկել, ըստ որի նրա աշխատավարձը մրցաշրջան առ մրցաշրջան կավելանա։
«Բարսելոնան» տեղյակ է, որ 17-ամյա հարձակվողը ակումբի գլխավոր դեմքերից մեկն է։
Միևնույն ժամանակ, իսպանական գրանդը չի ցանկանում խախտել ակումբի աշխատավարձերի հավասարակշռությունը, ինչպես նաև թույլ տալ, որ կրկնվի նախկին հարձակվող Լիոնել Մեսսիի հետ կապված իրավիճակը, ում պայմանագիրը չէր կարող գրանցվել 2021 թվականին՝ Լա Լիգայի ֆինանսական սահմանափակումների պատճառով։
Լա Լիգայի ակումբներին արգելվում է գրանցել ֆուտբոլիստներին, եթե նրանք իրենց եկամտի 70%-ից ավելին են ծախսում իրենց աշխատավարձերի վրա։ Մեսսիի պայմանագրով այս գումարը գերազանցել էր 100%-ը։
Յամալի ներկայիս աշխատանքային պայմանագիրը «Բարսելոնայի» հետ ուժի մեջ է մինչև 2026 թվականի ամառը։
