«Բարսելոնայի» մարզական տնօրեն Դեկուն ծրագիր է պատրաստում հարձակվողներ Լամին Յամալի ու Ռաֆինյայի, ինչպես նաև պաշտպան Ժյուլ Կունդեի հետ պայմանագրերը երկարաձգելու համար։ Այս մասին հայտնում է Mundo Deportivo-ն։

Աղբյուրի փոխանցմամբ՝ «կապտանռնագույնները» մտադիր են հաջորդ ամառ երկարաձգել Յամալի հետ պայմանագիրը մինչև 2030 թվականը, երբ նա կդառնա 18 տարեկան։ Իսպանացու գործող աշխատանքային պայմանագիրը նախատեսված է մինչև 2026 թվականի ամառ։

Կատալոնական ակումբը նախատեսում է Ռաֆինյայի հետ պայմանագիրը երկարաձգել ևս երկու-երեք տարով։ Նրա գործող աշխատանքային պայմանագրի ժամկետը լրանում է 2026/2027 մրցաշրջանի ավարտին։

Չնայած Կունդեի հետ պայմանագիրը երկարաձգելու ցանկությանը, «Բարսելոնան» դա հրատապ խնդիր չի համարում։ Հակառակ իրավիճակը վերաբերում է կիսապաշտպան Ֆրենկի դե Յոնգին, ում պայմանագրի ժամկետը լրանում է 2026 թվականի ամռանը։ Թիմը ցանկանում է պահել ֆուտբոլիստին, բայց նա պետք է ապացուցի իր օգտակարությունը մրցաշրջանի մնացած հատվածում։