PROFFOOTBALL-ը զրուցել է Հայաստանի ազգային հավաքականի նախկին կիսապաշտպան Արթուր Ոսկանյանի հետ։
– Արթուր կխոսե՞ք Հայաստանի հավաքականի առաջիկա խաղերի մասին, ի՞նչ սպասենք Վրաստանի դեմ խաղերում մեր ընտրանուց։
– Հայաստանի հավաքականի ցանկացած խաղ շատ կարևոր է։ Վրաստանի հետ խաղը ավելի մոտիվացնող է, քանի որ Վրաստանի հավաքականը լինելով մեր հարևանը և մասնակցելով Եվրոպայի առաջնությանը ավելի շատ փորձ է ձեռք բերել և մեզ համար ավելի մոտիվացիա կլինի հաղթել նման թիմին։ Չնայած պարտությունն էլ մեզ հնարավորություն կտա ավելի կարգով ցածր խմբում խաղալ ազգերի լիգայում և փորձել կատարել Վրաստանի և Մակեդոնիայի ճանապարհը, և այդ ուղղով փորձել մտնել Եվրոպայի առաջնության եզրափակիչ փուլ։ Պետք է աշխատենք հաղթել Վրաստանի հավաքականին, իսկ եթե չստացվի ապա չհուսահատվենք և փորձենք ինչպես ասեցի կատարենք Մակեդոնիայի և Վրաստանի ճանապարհը փորձելով մտնել Եվրոպայի առաջնության եզրափակիչ փուլ։
– Ի՞նչ եք կարծում, ով կլինի Հայաստանի հավաքականի գլխավոր մարզիչը։
– Միշտ ասել եմ, որ լավ կլինի որ Հայաստանի հավաքականի գլխավոր մարզիչը լինի հայ մասնագետ, բայց ֆեդերացիայի նախագահն ու փոխնախագահը հարցազրույցներում ասեցին, որ լինելու է արտերկրից և բանակցություններ են վարում արտերկրի մարզիչների հետ։ Ամեն դեպքում նրանք են պատասխանատուն և նրանք են ընտրելու մարզիչին։ Մեզ մնում է հավատալ և լինել մեր հավաքականի կողքին։ Անգամ եթե մարզիչը լինի արտերկրից ապա իմ կարծիքով մարզչական կազմը պետք է բալանսավորված լինի, այսինքն մարզչական կազմում պետք է լինեն նաև մի քանի հայ փորձառու մարզիչներ։
Սա իմ կարծիքն է և փորձի բերումով դա գտնում եմ ավելի ճիշտ։ Անգամ մեր ակումբներում եթե հրավիրում ենք արտասահմանցի մարզիչ, ապա մարզչական կազմում պետք է ունենանք հայ փորձառու մարզիչներ։ Դա շատ կարևոր է նաև թիմի մթնոլորտի համար, հայ ֆուտբոլիստների և լեգիոնականների ներդաշնակության համար։
Տեսեք երբ ես աշխատում էի «Նոայում» որպես սպորտային տնօրեն և մենք հրավիրել էինք գլխավոր մարզիչ արտերկրից, նրա օգնակններից մեկը արտերկրից էր, մյուսը մեր փորձառու ֆուտբոլիստ և մարզիչ Ալեքսանդր Թադևոսյանն էր, ֆիզիկական մարզիչը և վերլուծաբանը արտերկրից էին, իսկ դարպասապահների մարզիչներ էին փորձառու Ռոման Բերեզովսկին և Գևորգ Կասպարովը։ Մի խոսքով մարզչական կազմը բալանսավորված էր։ Դա շատ լավ է օգնում թիմի մթնոլորտին։ Նույնը կասեմ հավաքականի մասով։ Տեսեք օրինակ Վրաստանի հավաքականը հրավիրել է ֆրանսիացի մարզիչ, որը ունի բալանսավորված մարզչական կազմ, և չորս վրացի փորձառու և երեք արտասահմանցի մարզիչներ։
– Ձմեռային տրանսֆերային պատուհանի ժամանակ Հայաստանի առաջնությունում մի շարք տրանսֆերներ կայացան, ի՞նչ կասեք այս մասով և ո՞ր ակումբին եք համարում չեմպիոնության գլխավոր հավակնորդ։
– Շատ հետաքրքիր երկրորդ շրջան է սպասվում, հետևել եմ բոլոր թիմերի խաղերին, կասեմ որ թիմերը ավելի են ուժեղացրել իրենց կազմերը։ Առաջատար «Նոան» ունի լավ համալրումներ, «Փյունիկը», «Արարատ-Արմենիան», «Ուրարտուն», «Վանը», «Շիրակը» նույնպես համալրել են իրենց կազմերը և համոզված եմ չեմպիոնության և մրցանակային տեղերի համար թեժ պայքար է լինելու։ Հետևել եմ «Ալաշկերտին» և «Գանձասարին», որոնք նույնպես համեմատաբար ուժեղացել են։ Կարծում եմ հետաքրքիր առաջնության վերջնամաս է սպասվում։ Ֆուտբոլում կանխատեսել դժվար է, բայց իմ կարծիքով և քանի որ «Նոան» իմ թիմն է եղել, նրանք ավելի շատ շանսեր ունեն և կարծում եմ, որ չեմպիոն կդառնան։
