Իտալիայի Սուպերգավաթի եզրափակչում մրցեցին «Ինտերը» և «Միլանը»։

Հանդիպումն ավարտվեց «Միլանի» գերկամային հաղթանակով՝ 3։2 հաշվով։ Ընդորում, 47-րդ րոպեի դրությամբ «Ինտերը» հաղթում էր 2-0, իսկ «Միլանը» հաղթանակ կորզեց մրցավարի ավելացրած ժամանակի 3-րդ րոպեին: «Ինտերի» կազմից աչքի ընկան Լաուտարո Մարտինեսը (45+1) և Մեհդի Տարեմին (47), իսկ «Միլանից» հաջողության հասան Թեո Էրնանդեսը (52), Քրիստիան Պուլիշիչը (80) և Թեմմի Աբրահամը (90+3)։

«Միլանը» 2016 թվականից ի վեր առաջին անգամ նվաճեց Իտալիայի Սուպերգավաթը: Սա «ռոսոներների» 8-րդ սուպերգավաթն է: Այս ցուցանիշով «Միլանը» հավասարվեց «Ինտերին», իսկ ռեկորդակիրը «Յուվենտուսն» է, որը սուպերգավաթին տիրացել է 9 անգամ:

«Ինտերի» կիսապաշտպան Հենրիխ Մխիթարյանը մասնակցեց խաղին և փոխարինվեց 65-րդ րոպեին։