Անգլիական ակումբը հետաքրքրված է Պոլ Պոգբայի ծառայություններով

Ֆրանսիացի կիսապաշտպան Պոլ Պոգբան, ով նախկինում հանդես է եկել Թուրինի «Յուվենտուսում» և «Մանչեսթեր Յունայթեդում», կարող է վերադառնալ Պրեմիեր Լիգա։

Ինչպես հայտնում է Goal-ը, ֆուտբոլիստին հետևում է «Ֆուլհեմը»: Նշվում է, որ ֆուտբոլիստի շրջապատը նաև նրան խորհուրդ է տալիս կարիերան շարունակել Անգլիայում։

Ֆրանսիացին մտադիր է վերսկսել իր ելույթները բարձրագույն լիգայում։

Հիշեցնենք, որ նախորդ տարվա օգոստոսին ֆրանսիացի կիսապաշտպանը դրական դոպինգ թեստ էր հանձնել։ Փետրվարի 29-ին հակադոպինգային դատարանը հաստատել է ֆուտբոլիստին չորս տարով որակազրկելու որոշումը։ Այն բանից հետո, երբ դատարանը որոշեց որակազրկել Պոգբային, նա վերաքննիչ բողոք էր ներկայացրել։

Հոկտեմբերի 7-ին Մարզական արբիտրաժային դատարանը (CAS) հայտարարեց, որ կրճատել է ֆրանսիացի կիսապաշտպանի որակազրկումը մինչև 18 ամիս։ Այսպիսով, նա կկարողանա վերադառնալ պաշտոնական հանդիպումներին 2025 թվականի մարտին։