Իսպանիայի ազգային հավաքականի պաշտպան Մարկ Կուկուրելլան խոսել է «Չելսի»-ին միանալուց հետո հնչող քննադատությունների մասին:
«Երբ տեղափոխվեցի «Չելսի», ինձ հետ շատ բան պատահեց։ Մենք երկար ժամանակ հյուրանոցում էինք ապրում, երեխաները դպրոցում խնդիրներ ունեին, մեզ թալանեցին։ Տհաճ էր, քանի որ վախենում էինք։
Հետո ես երեք օր անցկացրի հիվանդանոցում վիրուսի պատճառով: Ես դեռ ցանկանում էի խաղալ, բայց լավագույն մարզավիճակում չէի: Սա նույնպես փորձ է։ Քանի դեռ դա չի պատահել ձեզ հետ, դուք չգիտեք, թե ինչպես եք արձագանքելու: Հիմա դա ինձ վրա չէր ազդի նույն կերպ։
Մինչ «Չելսիում» հայտնվելը ես խաղում էի ավելի փոքր թիմերում և այստեղ եկա փոփոխությունների ժամանակ, դժվար պահին, որտեղ շատ ֆուտբոլիստներ և մարզիչներ էին փոխվում: Դուք կմտածեիք, որ դա իմ մեղքն է, և մարդիկ շարունակում էին պատճառներ փնտրել ինձ մեղադրելու համար: Նրանք տեսնում են քո գինը և կարծում են, որ դու մեքենա ես, որը կխփի 50 գոլ և կտա 50 գոլային փոխանցում։ Սակայն սա պարզապես գործարք է ակումբների միջև՝ նրանք պայմանավորվում են գումարի շուրջ, և ես դրա հետ կապ չունեմ։
«Չելսիում» ավելի շատ մարզիչ եմ ունեցել, քան իմ ողջ կարիերայի ընթացքում։ Տուխել, Փոթեր, Լեմպարդ, Պոչետինո, այժմ` Էնցո Մարեսկա: Ես երկար ժամանակ չէի կարողանում աշխատել Տուխելի հետ, մենք հազիվ ժամանակ ունեցանք ծանոթանալու։ Հետո եկավ Գրեհեմ Փոթերը, ում գլխավորությամբ հանդես էի գալիս «Բրայթոնում», բայց նրա համար այստեղ հեշտ չէր։ Նա ուներ շատ ֆուտբոլիստներ, բայց չէր կարողանում ձևավորել իր ոճը: Լեմպարդի դեպքում էլ այդպես էր», – ասել է «Չելսիի» պաշտպանը։
