«Մանչեսթեր Յունայթեդի» գլխավոր մարզիչ Էրիկ տեն Հագը հավատում է իր թիմի հեռանկարներին նոր մրցաշրջանում:
«Կարմիր սատանաները» հոլանդացու գլխավորությամբ երկու մրցաշրջաններում էլ առանց գավաթների չեն մնացել. նախ նրանք նվաճեցին Անգլիայի լիգայի գավաթը, իսկ հետո՝ Անգլիայի գավաթը: Պրեմիեր Լիգայի նոր մրցաշրջանի մեկնարկից առաջ լրագրողները Տեն Հագին հարցրել են, թե արդյոք «Մանչեսթեր Յունայթեդը» ի վիճակի է կրկին նպատակաուղղվել տիտղոսների:
«Մենք երկու տիտղոս նվաճեցինք նախորդ երկու մրցաշրջաններում, ինչը մեզ վստահություն է տալիս, որ ունակ ենք հաղթելու: Մենք ավելի շատ տիտղոսներ նվաճեցինք այս ընթացքում, քան առաջնության ցանկացած այլ ակումբ՝ չհաշված «Մանչեսթեր Սիթին»»,- մանկունիանցիների մարզչի մեկնաբանությունը հայտնում է The United Stand-ը։
Ուրբաթ օրը «Մանչեսթեր Յունայթեդը» Պրեմիեր Լիգայի առաջին տուրում կխաղա «Ֆուլհեմի» հետ։
